Omtrint om 15.00 u. komt der op wonsdag datteg maai n bus vol ol
Roeskebruggers ien Spiek te lande en Jan Knollemoa vangt heur doar din op in
zien schiere Goultheoatertje ien Annaheerd.
Beetje drinken – beetje op verhoal kommen en Hans dut heur din n luchteg
lutje programmoa van omtrint vatteg menuten mit n lach - n troan(tje)
en n luk klain beetje weemoud omreden dat tied ja veuls te  gaauw veurbie  daldert.
Veur de laifhebbers van sfeer en gezelleghaid is t meschain sneu….mor t gebeuren
is stief besloten.

Zundagmirreg 10 juni zingt Hans ien t mooi kerkje van Oosterwietwerd
stoef bie nDaam. t Begunt om 14.30 u. Mit n pauze der bie kin t aal mitnaander
mor zo twij uur duren veuralleer t weer doan is. 
Hans dut maauwen omhoog en nimt zien aaldermooiste laidjes en vertelsters mit.
As ie der meer van waiten willen :   m.w.meijer@hetnet

Op 24 juni 2012 staait der weer n swaarftocht pland over t Wad.
Dat zel weden mit de wonderschone tjalk “De Groene Eenvoud” van
Annemarie van Garderen. Wie voaren din vanoet  “ t Jaachpad ” bie de sluus 
in Dokkumer Nieuwe Zijlen noar boeten.
Meer nijs over dit gebeuren wordt ankom joar op tied aangeven.
As t weden zel is muzikoale ienbreng veur reken van Hans van der Lijke
(Mit n keur aan zolde laidjes en ballades van aigen haand)

Zotterdag 14 juli is d’r bie “Molema fruitbedrijf” aan de Hoofdweg West 26
in Nieuwolda haile dag deur duchteg wat te doun. Op dij dag worden
kaarzenbomen plunderd. Nait zo as sprutters dat sums ommaans hemmen
mor nadjes en sekuur zo as Molemoa dat wil.
D’r is op dij dag hail wat te beleven op dit mooi streekproduktenbedrief.

Van 9.00 u. tot omtrint 13.00 u. zingt Hans van der Lijke doar zien laidjes
en ballades ien ons mooie Grunneger toal. Noa 13.00 u. binnen “Stroatklinkers”
aan beurt en dat belooft weer wat.
t Is doar op t terras genieten van meziek en hapjes – kovvie – thee - drankjes en
en nait te vergeten drij soorten schiere wien van de Oldambtster klaai. 
(Grootbrocht en botteld deur Molemoa himself) Winkel en bedrief binnen boetendes
n kiekje weerd en aal dij eerliekse Grunneger produkten lagen en knipogen joe tou.

( En nait baang weden veur n buitje want onderdak kinnen ie doar bie Molemoa ook
hail best weden.)
Ik wol mor even zeggen: Kommen – genieten – doun!

Op vrijdag mirreg 9 novemmer hemmen de Soamenwaarkende Oldernbonden n
gezellege dag ien t Trefcentrum ien Beem. Der is doar din hail wat te doun en veuraal
de inwendege  mins zel goud aan zien trekken kommen.  
Hans zel doar dij mirreg ien goud overleg n programmoa brengen doar de duur
op t heden nog nait van bekend is ….mor gezelleg en lekker wordt t aal mitnaander
veurvast en zeker. Veur de betere dikkerdakkers is t meschain schaand mor ook
dit gebeuren is stief besloten. 

In de Meulenbaarg / Delfziel is op zotterdagoavend 8 dezember 2012
n oavendvullend  programmoa te beleven.
Artiest doar t dij oavend om draait hait Klaas Spekken.
Klaas viert op dij menaaier t gegeven dat hai as zanger van t betere
Grunnegstoalege laid onder bedrieven deur al weer twaalf en n haalf
joar mit veul sukses van zok heuren lat.
Hou of oavend krekt verlopen zel doar heuren ie nog van, mor t is
veurvast n aanroader en ik bin der slim wies mit dat ik ook nuigd bin
om mien vertelsters – ballades en verskes  din en doar veur t voutlicht
te bringen.