Macht

Macht is veur t hemmen
veur t holden en hoalen
Macht het n smacht
Om te pronken en proalen

Macht vragt om grachten
En muren as dieken
Zel van zokzulm nait
Waiten van wieken

Macht nemt t recht
En de woarhaid in pacht
Macht staait veuraal
Veur zokzulm op de wacht

Gat ien hemel      

                                                                                                                    (foto Tinie Hoek)

          Ol Petrus staait bie  Hemelpoort
           En elk dij hom doar melden dut
          Ien vrede sturven – of vermoord
           Of op pensioun – of mit de V.U.T
      En hom nait steurde aan God ‘s woord
      Dij gaait doar bie dij poort veur schut
Het is doar n gefemel – gewimmel en gewemel
 
       Mor weest verheugd en wanhoop nait
                  D’r zit n gat ien hemel

• 
• 
• 
• 
• 

Hest dien vrije wil verscheten?
Het t leven die vergeten?
Bist zo zat as lepels eten
Zet die bie de wottervaal.

Loat dien ogen t wotter drinken
Loat tot op dien zail bezinken
Kieken – luustern – nait meer dinken
Tied as wotter – dat is aal.

Erik wil veur aaltied leven
t Schip van stain is achter bleven

Deur t Walhalla wil hai voaren
Tot ien aiveghaid van joaren
Zok op t wiede wotter woagen
Haile wereld schrik aanjoagen
Onder regenboog deur drieven
Tot aan aaltied voaren blieven
Branden wil hai – schroapen – groapen
Kiender – sierroad – vraauwlu – schoapen
Donar zel t dundern loaten
Zel hom aiveg plundern loaten

t Schip van stain is achter bleven
Erik wil veur aaltied leven

(Oland – Zweden)

• 
• 
• 

Muren dwaars over
Aal doudestieds zet
Muur veur wat mienent is
Muur veur wat dienent is
Veur aaltied op stee (?)
En veur aiveg op t swet (?)

Komt tied van geven en nemen – komt road
Komt tied van verlichten
Din kinve we heur slichten
Din kinve wel tou mit wat poaltjes en droad

• 
• 
• 
• 
• 

Norge is te grond oet kropen
Aal zien wonder wotterlopen
Doekeln – stroekeln zunder droalen
noar zien daibe gruine doalen

Norge is oet eerde nomen
Slepen dou – deur gletsjerstromen
Sikkom dag en nacht beregend
Deur de middernachtzun zegend

Norge is noar boven kommen
Is tot in de wolken klommen
Tot aan doar niks is te hoalen
Doar zien rendaaiern verdwoalen

Norge dut doar ale joaren
Winter even opbewoaren
Widde loakens op de huchten
Tot September niks te duchten

Norge – mout ik weer vervoaren
Wil ik die nog richt verkloaren
Dat ik aander joar weer geern
Kom om bie die aan te meren

Moi doe - grenieten reus                                                                                 Foto: Tinie Hoek
Men nuimt die doodgewoon mor “baarg”
Bie die bin ik n keudel
Bin ik n lutje beudel
Bie die bin ik nait zo veul meer
as t doemke van n dwaarg

Doe staais doar mit dien vurrels
in t  kloare kolle fjord
Bist naarns mit verlegen
Gain zun – gain wind – gain regen
Het zel die ale doagen echt nait jeuken
wat of t wordt

Doe bist zo groot – gain mins ien wereld
moakt die wat te doun
Van boven tot beneden
staaist doe doar baarg te weden
En wel dien joaren tellen wil – dij telt heur
per miljoun.

Ik dreumde dat ik dreumde
Van waarm en zuver zaand
Van zummer en van zoaleghaid
En van n zudelk laand

k Wer wakker aan de Nordkapp
t Is zunder flaauwekul
En k docht: t Is enkeld mor n grap
n Oavenrtuur – n spul

k Wer wakker aan de Nordkapp
Mien laifde aan mien zied
Mit krap twij groaden boven nul
En gain sekonde spiet

Doar was t lekker waarm  – vaaileg en sfeervol verlicht  en t vuur in de heerd haar der
ook zin aan.
Op n laange toavel ston n keur aan drinken en drankjes en feesteleke schuddels mit hapkes.
Gasten kwammen ain noa de aander binnen en rond negen uur kon ik begunnen aan mien
eerste  halfuurtje mit lutje vertelsters – laidjes – ballades en gedichten.
Kerel wat n idee om mie veur zowat te vroagen ……en wat n idee om joen beste vrunden
veur zowat te nuigen. Echt n  gezellege boudel mouken wie der mitnkaander van.
k Heb der zulf ook aaibels van genoten want bewoners en gasten haren zichtboar en heurboar
wil van mien optreden en boetendes:
Tiedens pauzes was der de wereld te ontdekken veur de lekkere bekjes en deurgewinterde
dikkerdakkers.
Jammiejammie!  En din aal dij drankjes….mor ja…….Popke Nathaals mos nog rieden…mor
thoes het hai der nog aine op nomen …..pardon………twij……Proost lu…tot aander moal!

Jan knollemoa zien Goultheoatertje in Spiek was aanderdoags (Zotterdagoavend 17 dezember)
oardeg goud bezet.
Om kwart over aacht mos ik mit t wotter veur de dokter. Drij blokjes van n haalf uur.
En zo as dat wil as t mooi gaait: Oavend was ook mor zo weer veurbie.
Jan haar t noa tied vot al weer over 2012 en wat mie aanbelangt: Ik kom groag nog weer n
moal oet want dat lutje Carré kins die aigelks nait veurstellen as je t nait zain hemmen.
Sfeer en sfeer en sfeer en ales in t klain wat grode Carré in t groot het. 
As Jan oet tied komt gaait zien theoatertje noar Madurodam…..let op mien woorden.

Jan het zien theoatertje inbaauwd in t “Goul” van zien boerenschuur.
“Goul” betaikent: roemte aan binnenkaant van de zoelen, doar vrouger t koren of t heu
optast wer. (Kiek mor in Ter Loan blz . 273)

Scheuvelloper, zanger, schriever, entertainer, fulmer, doezendbainder Free Westerhoff het de veurstellen digitoal opnomen. 
Vanzulf dat ik brandnijschiereg bin noar t resultoat mor ik mout nog even geduld hemmen.

Scroll veur Rondje Noord 2 en 1……..en  nog veul  meer,  omdeel.

Laplaand Noorwegen 2010

Zo dreug as beschuut

Zo bistoe geboren oet kuut en oet hom
Mit bruiers en zusters omrond en rondom
En swims deur n daibe oneindege kom

Zo bistoe geboren oet hom en oet kuut
Mor din noadert dien lot en hangs à la minuut
Op kop aan dien steert en zo dreug as beschuut