• 
• 
• 
• 
• 

Norge is te grond oet kropen
Aal zien wonder wotterlopen
Doekeln – stroekeln zunder droalen
noar zien daibe gruine doalen

Norge is oet eerde nomen
Slepen dou – deur gletsjerstromen
Sikkom dag en nacht beregend
Deur de middernachtzun zegend

Norge is noar boven kommen
Is tot in de wolken klommen
Tot aan doar niks is te hoalen
Doar zien rendaaiern verdwoalen

Norge dut doar ale joaren
Winter even opbewoaren
Widde loakens op de huchten
Tot September niks te duchten

Norge – mout ik weer vervoaren
Wil ik die nog richt verkloaren
Dat ik aander joar weer geern
Kom om bie die aan te meren

 Grenieten reus     (Lofoten – Noorwegen)

Moi doe - grenieten reus                                                                                 Foto: Tinie Hoek
Men nuimt die doodgewoon mor “baarg”
Bie die bin ik n keudel
Bin ik n lutje beudel
Bie die bin ik nait zo veul meer
as t doemke van n dwaarg

Doe staais doar mit dien vurrels
in t  kloare kolle fjord
Bist naarns mit verlegen
Gain zun – gain wind – gain regen
Het zel die ale doagen echt nait jeuken
wat of t wordt

Doe bist zo groot – gain mins ien wereld
moakt die wat te doun
Van boven tot beneden
staaist doe doar baarg te weden
En wel dien joaren tellen wil – dij telt heur
per miljoun.

Ik dreumde dat ik dreumde
Van waarm en zuver zaand
Van zummer en van zoaleghaid
En van n zudelk laand

k Wer wakker aan de Nordkapp
t Is zunder flaauwekul
En k docht: t Is enkeld mor n grap
n Oavenrtuur – n spul

k Wer wakker aan de Nordkapp
Mien laifde aan mien zied
Mit krap twij groaden boven nul
En gain sekonde spiet

Doar was t lekker waarm  – vaaileg en sfeervol verlicht  en t vuur in de heerd haar der
ook zin aan.
Op n laange toavel ston n keur aan drinken en drankjes en feesteleke schuddels mit hapkes.
Gasten kwammen ain noa de aander binnen en rond negen uur kon ik begunnen aan mien
eerste  halfuurtje mit lutje vertelsters – laidjes – ballades en gedichten.
Kerel wat n idee om mie veur zowat te vroagen ……en wat n idee om joen beste vrunden
veur zowat te nuigen. Echt n  gezellege boudel mouken wie der mitnkaander van.
k Heb der zulf ook aaibels van genoten want bewoners en gasten haren zichtboar en heurboar
wil van mien optreden en boetendes:
Tiedens pauzes was der de wereld te ontdekken veur de lekkere bekjes en deurgewinterde
dikkerdakkers.
Jammiejammie!  En din aal dij drankjes….mor ja…….Popke Nathaals mos nog rieden…mor
thoes het hai der nog aine op nomen …..pardon………twij……Proost lu…tot aander moal!

Jan knollemoa zien Goultheoatertje in Spiek was aanderdoags (Zotterdagoavend 17 dezember)
oardeg goud bezet.
Om kwart over aacht mos ik mit t wotter veur de dokter. Drij blokjes van n haalf uur.
En zo as dat wil as t mooi gaait: Oavend was ook mor zo weer veurbie.
Jan haar t noa tied vot al weer over 2012 en wat mie aanbelangt: Ik kom groag nog weer n
moal oet want dat lutje Carré kins die aigelks nait veurstellen as je t nait zain hemmen.
Sfeer en sfeer en sfeer en ales in t klain wat grode Carré in t groot het. 
As Jan oet tied komt gaait zien theoatertje noar Madurodam…..let op mien woorden.

Jan het zien theoatertje inbaauwd in t “Goul” van zien boerenschuur.
“Goul” betaikent: roemte aan binnenkaant van de zoelen, doar vrouger t koren of t heu
optast wer. (Kiek mor in Ter Loan blz . 273)

Scheuvelloper, zanger, schriever, entertainer, fulmer, doezendbainder Free Westerhoff het de veurstellen digitoal opnomen. 
Vanzulf dat ik brandnijschiereg bin noar t resultoat mor ik mout nog even geduld hemmen.

Scroll veur Rondje Noord 2 en 1……..en  nog veul  meer,  omdeel.

Laplaand Noorwegen 2010

Zo dreug as beschuut

Zo bistoe geboren oet kuut en oet hom
Mit bruiers en zusters omrond en rondom
En swims deur n daibe oneindege kom

Zo bistoe geboren oet hom en oet kuut
Mor din noadert dien lot en hangs à la minuut
Op kop aan dien steert en zo dreug as beschuut

• 
• 
• 

Laplaand/Noorwegen 2010

Zummer het dat stee verloren

Der is n stee - te roeg veur woorden
Doar kin winter aaltied blieven
Hoog – op t aalderhoogste noorden
Lat zok doar nait meer verdrieven

Zummer het dat stee verloren
Veujoarsdag het doar gain rechten
Kin gain vlindertje bewoaren
Kin gain swalfke tegen vechten

Haarstdag kin doar ook nait weden
Mor zel doar gain dag om treuren
Enkeld mor gewoon omreden
Hangt gain blad om bié te kleuren

 Noorwegen 2011

• 
• 
• 

Spaigel dien schoonhaid

Spaigel dien schoonhaid
Doe – spaigel dien beeld
Bist as n laid
Dat mien moudveren streelt

Spaigel dien schoonhaid
Doe – hol mie omaarmd
Bist as n klaid 
Dat mie waarmt en beschaarmt

Spaigel dien schoonhaid
Doe – nuver en hail
Spaigel en wait
Doe bist zaalf veur mien zail

——————

Tekst Hans van der Lijke/Foto ‘s Tinie Hoek

Moi,

Oafgelopen zundag 18 september gingen bie Jan Knollemoa ien Spiek
de gerdienen open en t was der geliek groot feest.
t Wazzen noamelk gain deurdeweekse gerdientjes mor echt velouren theoaterdouk.
Jan het t vak van theoaterdirekteur al tien joar achter zok liggen mor zien lier wil nog nait recht 
aan de wilgen.
t Lutje theoatertje dat hai oafgelopen joaren mit wat hulp kloar kregen het, opende zien deuren mit
n swingend jazzy combo….tussendeur nog  n aantal ras muzikanten…….en mit dichter/schriever en
veurdrachtskunstenoar Henk Puister en mit de troubadour dij dit stukje tekst ommaans het.

In t levensechte theoaterzoaltje waren ale viefteg schiere zitploatsen bezet en genoten minsen van
ales wat doar in t verlengde van Jan zien unieke initiatief te beleven vil.
Mooi om t aal mit te moaken en al hailemoal om ook op dat podium n biedroage levern te kinnen.

Baanderdeuren van Jan zien boerenheerd stonnen wiedwoagen open en lopend deur de veurmoalege
stallen kwam ik oet in de foyer dij zien noam as zodoaneg inderdoad dik verdaint.
Jas oflevern op stee, krekt zo as t heurt - nog even noar de noagelnije en blinkende toiletten om de
zenen der oet te miegen en din weerom deur de foyer noar t artiestenverblief. Doar komt (reken ik)
nog tapijt op vlouer. Veur de rest zag t der nadjes oet.
Op n schaarm kon men doar klip en kloar volgen wat der op t podium op t zulfde moment te doun was.
Jan wait boetendes wat n artiest toukomt. Koelkaast mit verfrizzende inhold nuigde ons deurlopend.    

Knollemoa gaait veur dit joar nog t ain en aander programmeren en doar binnen veul lokoale en
regionoale laifhebbers van meziek – klainkunst en streektoal slim wies mit. Wat miezulf aangaait….
Dizze man staait op t schoefie om op n zotterdagoavend of n zundagmirreg op de planken te stoan
van dat lutje Spiekster Carré.

Groutnis.

Haalve moand juli en eerste week augustus hemmen wie weer op roakeldais
west deur Scandinavie.
Wie mouken dagtochten vanoet t schitternde Sognedal noar ale windstreken
van wonderlaand Noorwegen.
Berichten over wat der ondertied in Oslo veurvalen was …….. nait te vatten!
Ien ale kerken lagen bloumen…stonnen brandende keerskes….
Op t sentroale plaain ien Sognedal: Honderd vaaierkaante meter mit knuffels…
koartjes… braiven…bloumen…bloumen…bloumen……….
t Is ja onbegriepelk dat zowat mor zo gebeuren kin ien zo’n stainriek en
prachteg laand. n Laand doar de netuur zok deur minsen nog laange nait
ienpakken lat.
t Laandschop overstemt mien gedachten…. t moakt stil…en weemoudeg sums
omreden dat ain ding doar veuraal hail dudelk wordt: “Wie hemmen n wereld as
aarfgoud mitkregen….zo mooi ….zo mooi….. nait te zeggen zo mooi.”

Omreden dat ik nou ainmoal geren schrieven mag, over mooi (en maal), haar k
pen en pepier mitnomen. Dat was ook mor goud want der binnen doar tien
gedichten over dij sprookjeswereld te veurschien kommen.
As Tinie heur giga aantal foto ‘s sorteerd het, zelwe op dit stee dij gedichten
ain noa d’ aander stoareg aan ploatsen kinnen.
( Mit heur haile biezundere foto ‘s as illustroatsies)

Twijde week ien Noorwegen ston der n grappege nuigen op de mail doar ik
oeteindelk hail dankboar op iengoan kon.
Van dij gevolgen ston ik zundag vattien augustus op n buhne ien
Amsterdam-Noord.

Meschain dat t gebeuren ien Oslo der tou biedroagen het, dat ien Amsterdam deur
lu van “De Tolhuistuin” n intercultureel programmoa soamensteld wer mit n hail
biezundere opzet.
t Gehail kwam aan loop onder de noam: “Het lied dat je meenam.”
Zes braivenschrievers, geboren ien…. Iran – Egypte – Engelaand – Marokko -
Surinoame en Grunnen, leesden elk n braif veur dij zai schreven haren aan n persoon
ien heur geboortelaand. Ien dij braiven wer t onderschaaid oetstukt tussen t laand van
herkomst en t nije voaderlaand. Ien aal dij ( hail verschillende) braiven zat veul
humor mor ook daipe ernst – pien en emotie en t vil nait aaltied tou om ogen der
dreug bie te holden.
Schrievers haren ook elk n laid aangeven doar heur gevuil veur t geboortelaand
tot ien oetdrukken kwam. Aafke Steenhuis (geboren op t Hoogelaand/Grunnen) haar
kozen veur “Mien Hoogelaand” van Ede Stoal. t Was n eervolle opdracht om dit schitternd
laid op mien aigen wieze zo goud meugelk heuren te loaten  (Mit n nummer van aigen haand
der bie tou)
Sikkom de helft van Amsterdammers is van allochtone oafkomst…. en op vattien augustus 2011
hemmen wie weer ais beleven kinnen wat ons as minsen oet aal dijverschillende horns en houken
van de wereld bindt. t Was n dag om nait gaauw te vergeten.

Groutnis………………………………………………………………………………….Hans van der Lijke

Al weer 19 juni…..tied daldert sums en din mit windkracht tien deur t doagelks leven.

t Is al weer n dikke vattien doagen heer da k veur t lest muzikoal van mie heuren luit.
Dat was in Troapel, doar Klaas Spekken in zien toen sums n openluchttheoater het,
en doar hai t bliekboar ook veur wat betreft de boetentemperatuur veur t zeggen het
want t was doar in t mooie Westerwolde op vaier juni n dreuge  en schiere
veurjoarsoavend.
Klaas zien toen is roem en het veul sfeer. Onder n oafdak van poalen en douk
stonden riegen klapstoultjes dij tegen negen uur s oavends grotendails
innomen werren deur n aandachteg pebliek. Klaas zien schemeroavendkonserten
roaken  onderhand bie n duchteg aantal laifhebbers bekend en hailwel woardeerd.

Dat is o.a omreden dat organisoatsie (doar meerdere personen bie betrokken binnen)
in goie handen is. Veur t overege is Klaas n entertainer eerste klas, n goie presentator
en aal met aal n gastheer dij wait woar zien pebliek veur komt……………………………
(Mooie laidjes/aigen waark/perfekte vertoalens/schiere begelaaiders enz.)

Op dij lije veurjoarsoavend zotterdag vaier juni was ik zien muzikoale gast en hemmen
wie mekoar oafwisseld. Elk mit ons aigen repertoir en ik heb der van genoten….
Wat mie betreft: “Veur herhoaling vatboar!”

Van t optreden op dizze mooie veurjoarssoavend binnen deur Free Westerhoff n aantal regisstroatsies
moakt. Free is n doezendbaainder en dat betaikent dat hai o.a aktief is as zanger van
n Grunnegstoaleg kwartet genoamd Daip river’
Free schrift kurte verhoalen en het deur de joaren hin zien sporen verdaind in de grode ritten op scheuvelies
(in binnen- en boetenlaand)
Boetendes moakt hai professionele registroatsies van verschillende evenementen. Op t internet- en ook op zien
webstee binnen doar knappe veurbeelden van te vinden  www.freewesterhoff.nl   

(Foto: Martin Smit)                                                               

……………………………………

Hail aanswat.

Op mien site is “ LUUSTERN “ aanvuld mit 20 laidjes. Dat  betaikent dat t totoal aan te
beluustern en te downloaden laidjes en fiebeldekwinten, sunt n week oetbraaid is tot
46 stuks. Ik wens joe sukses bie t downloaden en vanzulf veul groates luusterplezaaier.

Wieder is ook ” TINIE S  HOEK ” oetbraaid mit t verslag van n raais deur
Laplaand/Zweden zoas wie dat eerverleden joar oaventuurd hemmen.
Dat verslag bestaait oet twinteg gedichten dij deur mie schreven binnen,
veuraal noar aanlaaiden van inspirerend fotomaterioal van Tinie.
Dat fotomaterioal is doar vanzulf ook te bewondern.

“t Ontwaarp- de oetvoering en t onderhold van de site binnen in handen
van de programmeurs- en designers van “Studio Oudeschip”  René Diekstra
en Vita van der Lijke.
Dat mog onderhand ook wel ais even zegd wezen.

Groutnis……. en vernuvert  joe der mit

Hans van der Lijke